Տաթևի ճոպանուղին աշխատում է ամենօրյա ռեժիմով

Գինեսի ռեկորդակիր Տաթևի ճոպանուղին մարտի 1-ից աշխատում է ամենօրյա գրաֆիկով` ժամը 10.30-ից մինչև 16.30: Նախկինում, ձմեռային սեզոնով պայմանավորված, միայն շաբաթ-կիրակի էր աշխատում:

Հիմա եղանակային պայմանները թույլ են տալիս ամեն օր աշխատելու:

Ի դեպ, ըստ ճոպանուղու կառավարիչ Տիգրան Ղազարյանի, այցելուների թվի աճ է նկատվել այս ամսին:

«Դա կապված է միջպետական ու համայնքային ճանապարհների բաց լինելու հետ: Այս պահին ճոպանուղին արդեն իսկ ձմեռային ռեժիմից անցնում է ամառայինի, ու հավաստիացնում եմ, տեխնիկական խնդիրներ չկան: Օրական մոտ 1000 ուղևորի կարող ենք սպասարկել»,-ասաց Տ.Ղազարյանը:

5700 մետր երկարությամբ ճոպանուղու մեկ ուղղությամբ ճանապարհը 11 րոպե է: Յուրաքանչյուր ուղղությամբ միաժամանակ կարող է երթևեկել մեկական տրամվայ-վագոն՝ մինչև 25 ուղևորով:

Տաթև-Հալիձոր երթուղին արժե 2000, իսկ հետադարձ ուղղությունը ներառյալ՝ 3000 դրամ։

Հարակից 6 գյուղերի՝ Հալիձորի, Տաթևի, Սվարանցի, Խոտի, Շինուհայրի, Տանձատափի բնակիչները հնարավորություն ունեն օրվա մեջ մեկ անգամ ճոպանուղով երթևեկել անվճար։

«Գյուղացիները ճոպանուղին որպես տրանսպորտային միջոց են օգտագործում, հիմնականում առավոտյան և երեկոյան ժամերին են օգտվում՝ աշխատանքի գնալիս և վերադառնալիս»,-ասում է Տիգրան Ղազարյանը:

Ի դեպ, շահագործման օրվանից՝ դեկտեմբերի 23-ից մինչև օրս Տաթևի ճոպանուղին 10 հազար ուղևոր է ունեցել:

                                                                                                                  1in.am