Գորիսի Վաղարշ Վաղարշյանի անվան պետական դրամատիկական թատրոնում հայ թատերարվեստի ներկայացուցիչների մասնակցությամբ նշվեց թատրոնի միջազգային օրը: Ողջունելով հանդիսույթի մասնակիցներին՝ Սյունիքի մարզպետ Սուրեն Խաչատրյանը մասնավորապես նշեց. «Սիրելի հայրենակիցներ, հարգարժան պրն. Ղազանչյան, ուզում եմ ողջունել Ձեզ և Ձեր թատերական խմբի ներկայացուցիչներին՝ Սյունիքի տարածաշրջանում գտնվելու համար: Սրտանց շնորհավորում եմ թատրոնի միջազգային օրվա կապակցությամբ: Իսկապես, սյունեցիներիս համար թատրոնը միշտ էլ եղել հարազատ միջավայր: Քանի որ մեր նախնիները դեռևս 1500 տարի առաջ ունեցել են ժայռափոր թատրոն, որը մինչև հիմա պահպանվել է: Այն որպես մշակութային արժեք հիացնում է շատ շատերին»:
Հայաստանի թատերական գործիչների միության նախագահ Հակոբ Ղազանչյանը՝ ողջունեց ներկաներին, ևս մեկ անգամ շնորհավորեց բոլորին՝ թատրոնի օրվա առթիվ: «Ուրախ եմ այսօր ներկա գտնվել այն դահլիճում, որտեղ իր վերջին ներկայացումն ունեցավ մայրս՝ Գայլա Նովենցը: Արդեն 4-րդ տարին է, ինչ Հայաստանի թատերական գործիչների միության անդամներն ավանդույթի համաձայն՝ թատրոնի օրը նշում են ոչ միայն Երևանում, այլև մարզերում»:
Մինչ այդ Հայաստանի թատերական գործիչների միության անդամները թատրոնի օրը նշել են Արտաշատում, Գյումրիում, նախատեսում են նաև տոնը նշել Ստեփանակերտում: «Սիրել թատրոն, չի նշանակում միայն գովել, պրեմիերաների գալ ու հոտնկայս ծափահարել: Սիրել՝ նշանակում է վատին վատ ասել, լավին լավ: Բայց միշտ պետք է թատրոնը գնահատական ունենա, քանզի հենց այդ գնահատականն է թատրոնի շարժիչ ուժը», -ասաց Հակոբ Ղազանչյանը: Շնորհակալություն հայտնելով Սյունիքի մարզպետ Սուրեն Խաչատրյաին՝ հյուրնկալության համար, Հ. Ղազանչյանը նրան նվիրեց՝ վերջերս Կանադայում հրատարակված, իր տեսակով բացառիկ մի գիրք, որի հեղինական է արվեստաբան Ալիս Նավասարդյանը: 
Комментариев нет:
Отправить комментарий