Փետրվարի համեմատ ցորենի միջազգային գները նվազել են 15-20 տոկոսով։ Ցորենի էժանացման հիմնական «մեղավորը» ԱՄՆ-ի գյուղատնտեսության նախարարությունն է, որը հայտարարել է ցորենի պաշարների ավելացման մասին։
Թեեւ ցորենի միջազգային գների նվազման միտումը պահպանվել է համարյա ողջ մարտի ընթացքում, Հայաստանում այն գրեթե չի զգացվում։ Այսօր՝ մարտի 15-ին Սուրմալուի տոնավաճառում բարձր կարգի ալյուրի 50 կգ-անոց պարկը վաճառվում էր 12,6 հազ. դրամով։ Այսինքն՝ 1 կգ ալյուրի մեծածախ գինը 252 դրամ է՝ շատ քիչ զիջելով փետրվարի սկզբի գներին։ Հնարավոր է՝ ալրաղացները ալյուրն ավելի էժանացնեն միայն այն բանից հետո, երբ կսպառեն հունվար-փետրվարին համեմատաբար թանկ գներով ներմուծված ցորենը:
Չի բացառվում, որ ցորենի գնի վրա ազդեն Ճապոնիայում տեղի ունեցող աղետները։ Առայժմ իրավիճակը նպաստում է ցորենի գնի անկմանը, սակայն Commerzbank-ի փորձագետները հայտարարել են, որ ճապոնական ալրաղացներում պահվող հացահատիկի մոտ 20 տոկոսը վնասվել է երկրաշարժի ու ցունամիի պատճառով։
Եթե այդ տեղեկատվությունը հաստատվի՝ Ճապոնիան պետք է հացահատիկի մեծածավալ ներկրումներ իրականացնի, հիմնականում՝ ցորեն, եգիպտացորեն եւ սոյա։ Իսկ դա կարող է բարձրացնել հացահատիկայինների միջազգային գները։
Комментариев нет:
Отправить комментарий